Muerre un trabayador de la construcción nel barriu xixonés de Nuevo Roces  

L'home tenía 62 años y taba trabayando nun edificiu en construcción

Un trabayador del sector de la construcción morrió esti martes nel barriu xixonés de Nuevo Roces nun accidente llaboral, confirmaron fontes de la Policía Nacional.

L’accidente foi al rodiu les 13:00 nun inmueble en construcción asitiáu na avenida de Roces. L’home tenía 62 años. Según les primeres informaciones, un andamiu cayó y pegó-y na cabeza.

L’accidente foi’l mesmu día en que representantes de la Delegación del Gobiernu, del Principáu, los sindicatos y la patronal aconceyaron p’analizar los últimos accidentes llaborales rexistraos na comunidá autónoma.